Sa isang buong araw ng matinding sigawan, nag-aalab na musika, at nagkakaisang puso, muling umalingawngaw sa Lungsod ng Malolos ang diwa ng kalayaan sa pamamagitan ng Rakpublika 2025. Bitbit ang temang “𝐼𝑠𝑎𝑛𝑔 𝑆𝑖𝑔𝑎𝑤, 𝐼𝑠𝑎𝑛𝑔 𝐵𝑎𝑛𝑑𝑎, 𝐼𝑠𝑎𝑛𝑔 𝑃𝑎𝑔𝑚𝑎𝑚𝑎ℎ𝑎𝑙,” ginanap ang libreng konsiyertong ito sa bagong Malolos Amphitheater at Banchetto Open Grounds bilang pagdiriwang ng ating kasarinlan at pagpupugay sa Unang Republika ng Pilipinas—ang kauna-unahang republika sa buong Asya.

Sa taunang pagdaraos, muling pinatunayan ng Rakpublika 2025 na ang musika ay hindi lamang isang anyo ng aliwan kundi isang makapangyarihang instrumento ng pagkakaisa. Sa dalawang entabladong nakalatag, nagsanib-puwersa ang ilan sa mga kilalang banda ng lokal na rock at reggae scene—Wilabaliw, Saydie, Chocolate Factory, The Chongkeys, at P.O.T kasama rito ang ilang mga lokal musikero mula sa lungsod. Sa kanilang matitinding riff, matapang na liriko, at walang humpay na enerhiya, ginising nila ang diwang makabayan ng libu-libong Maloleño at mga bisitang nakiisa.

Ang Rakpublika ay isang pagkilos na mapagtibay ating identidad bilang isang bansang malaya. Sa bawat awiting sinabayan ng libu-libong tinig, damang-dama ang diwa ng pagkakaisa at pagmamalasakit sa sariling kultura. Ito ay isang patunay na ang kalayaan ay hindi lamang bahagi ng kasaysayan kundi isang adhikain na patuloy nating ipinagbubunyi at ipinaglalaban hanggang sa mga susunod na henerasyon.

Mabuhay ang Unang REPUBLIKA sa ASYA! Mabuhay ang Bansang PILIPINAS!! Mabuhay ang Lunsod ng MALOLOS!!! Isang sigaw! Isang bansa! Isang pagmamahal! Itong Pambansang Alay LIBRE HABAMBUHAY!