Bilang bahagi ng Fiesta ng Republica 2025, idinaos nitong ika-15 ng Enero ang “𝐊𝐚𝐬𝐚𝐥𝐚𝐧 𝐬𝐚 𝐑𝐞𝐩𝐮𝐛𝐥𝐢𝐤𝐚” sa Waltermart Malolos. Ang seremonya ay pinangunahan ni Punong Lungsod Abgdo. Christian D. Natividad, katuwang ang City Tourism Division, kung saan 14 na magkasintahan ang opisyal na ikinasal.

Ayon kay Punong Lungsod , “ito pong araw na ito is a 𝑣𝑒𝑟𝑦 𝑖𝑚𝑝𝑜𝑟𝑡𝑎𝑛𝑡 𝑑𝑎𝑦, isang mahalagang araw na puno ng pag-aabang dahil may magaganap na espesyal na seremonya. Nakasuot ng magagara ang lahat, tanda ng kahandaan sa isang bagong kabanata ng buhay.

Ang araw na ito ay isang bihirang pagkakataon upang magsimula ng panibagong yugto ng inyong buhay, isang yugtong kayo lamang ang maaaring magbigay ng kulay.

Sa ilalim ng batas ng Pilipinas, pag-iisahin ang buhay ng magkasintahan. Hinalintulad ang relasyon ng mag-asawa sa isang tricycle, ang motor at sidecar na laging magkasama. Ito ay may kaakibat na obligasyon at responsibilidad.

“𝑰𝒕 𝒄𝒐𝒎𝒆𝒔 𝒘𝒊𝒕𝒉 𝒐𝒃𝒍𝒊𝒈𝒂𝒕𝒊𝒐𝒏𝒔 𝒂𝒏𝒅 𝒓𝒆𝒔𝒑𝒐𝒏𝒔𝒊𝒃𝒊𝒍𝒊𝒕𝒊𝒆𝒔. 𝑰𝒕 𝒊𝒔 𝒔𝒑𝒆𝒄𝒊𝒂𝒍 𝒃𝒆𝒄𝒂𝒖𝒔𝒆 𝒊𝒕 𝒊𝒔 𝒏𝒐𝒕 𝒐𝒓𝒅𝒊𝒏𝒂𝒓𝒚,”ani ng Punong Lungsod Natividad. Ang tinutukoy na pananagutan ay tinawag niyang marital obligations and responsibilities.

Ikinumpara rin ni Punong Lungsod Natividad ang marital obligations sa paglalaro ng basketball ni Kai Sotto sa ibang koponan. Tinanong niya ang magkasintahan kung kilala nila ang pamilya ng kanilang magiging asawa at kung handa na silang maging magulang sa kanilang bubuuing pamilya. Pinaalala niya na dapat kilalanin ang “𝑡𝑒𝑎𝑚” na kanilang sasamahan—ang ugali ng isa’t isa at kung paano ilulugar ang sarili sa bagong buhay.

“𝑾𝒊𝒕𝒉 𝒂𝒍𝒍 𝒕𝒉𝒆 𝒎𝒂𝒓𝒊𝒕𝒂𝒍 𝒐𝒃𝒍𝒊𝒈𝒂𝒕𝒊𝒐𝒏𝒔 𝒂𝒏𝒅 𝒓𝒆𝒔𝒑𝒐𝒏𝒔𝒊𝒃𝒊𝒍𝒊𝒕𝒊𝒆𝒔, 𝒚𝒐𝒖 𝒄𝒂𝒏 𝒏𝒆𝒗𝒆𝒓 𝒈𝒐 𝒘𝒓𝒐𝒏𝒈”, dagdag pa ni Punong Lungsod.

Binigyang-diin niya na ang kontrata ng kasal ay hindi basta-basta kundi isang espesyal na kasunduan. Kapag nilagdaan ang kontrata ng kasal, magbabago ang takbo ng buhay, kabilang ang pagsuko ng mga personal na ari-arian na magiging pag-aari ng mag-asawa bilang isa.

Sinundan ang seremonya ng 𝑒𝑥𝑐ℎ𝑎𝑛𝑔𝑒 𝑜𝑓 𝑣𝑜𝑤𝑠, pagpapalitan ng singsing, paghalik ng bawat magkasintahan bilang tanda ng kanilang pangako sa isa’t isa at pagdeklara ng ang mga magkasintahan ay kasal na.

Samantala, nagbigay din ng mensahe si Pangalawang Punong Lungsod Miguel Alberto T. Bautista. Masaya niyang binati ang mga magkasintahang bahagi ng seremonya. Ani niya, ang okasyong ito ay pagdiriwang ng biyaya ng pagmamahalan at pagkakaisa bilang bahagi ng Fiesta ng Republika. Hiniling niya ang presensya ng Panginoon sa buhay ng mga bagong mag-asawa at hinikayat silang pahalagahan ang espesyal na sandali.

Ang “Kasalan sa Republika” ay patuloy na nagbibigay-daan sa mga magkasintahan na ipagdiwang ang kanilang pagmamahalan at pagsasama. Ito rin ay naging simbolo ng pagkakaisa sa pagdiriwang ng makasaysayang pista ng lungsod.

Dumalo at nakiisa sa seremonya sina Marvin Dioniso, Mall Manager, Fernando E. Durupa, Chief of Staff, City Administrator Joel S. Eugenio at si PLTCol. Rommel E. Geneblazo.